Termiz iqtisodiyot va servis universitetida “Ma’rifat ulashib” loyihasi doirasida yurtimiz adabiy muhitiga munosib hissa qo‘shib kelayotgan shoirlarimiz bilan ma’naviy-ma’rifiy uchrashuv tashkil etildi.

Tadbirga O'zbekison xalq shoiri Usmon Azim, "Shuhrat" medali sohibi Shuhrat Orif hamda Dadaxon Muhammadiyevlar mehmon sifatida tashrif buyurib, universitet hamda unda yaratilgan sharoitlar bilan yaqindan tanishdilar. 

Tadbirning asosiy qismida talabalar bilan suhbat tashkil etildi. Uchrashuv davomida mehmonlar o‘zlarining hayot yo‘llaridan misol keltirgan holda yoshlarimizni ilmi-ma’rifatli va ona vatanimizga muhabbatli insonlar bo‘lishga chorlab, ijodlaridan namunalar taqdim qildilar.

“Ma’rifat ulashib” loyihasi doirasida taniqli shoirlar Usmon Azim, Shuhrat Orif hamda Dadaxon Muhammadiyevlar bilan universitetimizda boʻlib oʻtgan uchrashuv she’rxonlikka ulanib ketdi. Talaba-yoshlar shoirlarning hamda o‘zlarining ijodlaridan parchalar o‘qishdi.   

Shundan so‘ng, universitetimiz yoshlari oʻrtasida oʻtkazilgan “Zukko kitobxon”, “Zakovat” va “Renessans” kabi koʻrik-tanlov gʻoliblari munosib taqdirlanishdi.

Jamoamiz bilan birgalikda ham “Zukko kitobxon”, ham “Zakovat” bilimlar bellashuvida gʻoliblikni qoʻlga kiritdik, — deydi “Zulfiya izdoshlari” nomli jamoa sardori Sevara Toʻylieva. — Albatta, buning uchun guruhimiz bilan birgalikda hamjihat boʻlib koʻproq badiiy adabiyotlarni mutolaa qildik. Buning uchun ustozlarimizga va universitet rahbariyatiga minnatdorlik bildiraman.

Tadbir nihoyasida mehmonlarga zarrin to‘n kiygizilib, sovg‘alar ulashildi.

Tadbirdan so'ng, “Ma’rifat ulashib” loyihasi doirasida universitetimiz tashabbusi bilan taniqli shoirlar Shuhrat Orif hamda Dadaxon Muhammadiyevlar ishtirokida Termiz tumanidagi 12 - Ayrim fanlar chuqur o'rganishga ixtisoslashgan maktabida o‘quvchi-yoshlar bilan uchrashuv tashkil etildi. 

O‘quvchilarga bugungi adabiy jarayonlar, hayot yo‘llarida orttirgan tajribalari haqida so‘zlab berishdi. Vatanparvarlik, insoniylikni madh etuvchi she’rlaridan namunalar o‘qishdi.

Tadbirda maktab o‘quvchilari o‘zlarining badiiy chiqishlari bilan yig‘ilganlarga xush kayfiyat ulashishdi. Uchrashuv so‘ngida Termiz iqtisodiyot va servis universiteti tomonidan maktab kutubxonasiga kitoblar jamlanmasi taqdim etildi.

Shundan so‘ng, Termiz shahrida joylashgan "Yulduz" mahallasidagi ijtimoiy ko‘makka muhtoj xonadonlardan biriga tashrif buyurishib, universitet homiyligi ostida kitob jamlanmasi va elektr pech sovg‘a qilindi.