TISU delegatsiyasining Pragadagi Chexiya tabiiy fanlar universitetiga (Czech University of Life Sciences Prague) rasmiy tashrifi uyushtirildi. Tashrif davomida universitetdagi ta’lim jarayoni va mavjud sharoitlar bilan tanishtirildi. Muzokaralar jarayonida universitetlararo memorandum imzolash, talabalar akademik almashinuvini yo‘lga qo‘yish, universitetimiz talabalari uchun qisqa muddatli malaka oshirish va stajirovka kurslari (Yozgi va Qishki maktablar) hamda qo‘shma ta’lim dasturlari tashkil etishga kelishib olindi.
Aytish kerakki, Pragadagi Chexiya tabiiy fanlar universiteti (CULS) Chexiya Respublikasining uchta eng yirik universitetlaridan biridir. O‘quv binolari, yotoqxonalar, galereyalar, laboratoriyalar va kutubxonalar joylashgan universitet shaharchasida kafelar, sport majmualari, bank filiali, restoranlar va klublar mavjud.
Mazkur universitetda atrof-muhitni muhofaza qilish sohasida tadqiqotlar olib boriladi. CULS o‘quv dasturlarini kengaytirib, talabalarga nafaqat atrof-muhitni muhofaza qilish yo‘nalishlari bo‘yicha, balki iqtisodiyot, menejment, ma’muriyat va kompyuter fanlarini o‘rganish imkoniyatini ham taqdim etadi. Iqtisodiyot va menejment fakulteti universitetdagi eng yirik fakultet: talabalarning 50 foizdan  ortig‘i u yerda tahsil oladi. Ushbu universitetning asosiy yutug‘i shundaki, universitet bitiruvchilarining deyarli barchasi ish bilan ta’minlanadi.